Ўрама печенье
Масаллиқлар: 250 гр сариёғ, 1 ст. сметана ва ёнғоқ, 3 ст. ун, қанд упаси, 0,5 ст. шакар, бир чимдим туз ва 1 чой қошиқ истеъмол содаси.
Тайёрланиши: хамирни тайёрлаш учун аввал сметанага туз ва истеъмол содасини солиб, аралаштирамиз. Алоҳида идишда 200 гр сариёғ билан унни уқалаб, увоқ ҳолига келтирамиз. Унга сметанали аралашмани солиб, ўртача қаттиқликдаги хамир қорамиз. Уни музлатгичда 30 дақиқа тиндирамиз.
Хамир тингунига қадар ўраманинг начинкасини тайёрлаб олсак. Ёнғоқни майдалаймиз. Унга шакар ва 50 гр сариёғни солиб, бир хил масса ҳосил бўлгунига қадар аралаштирамиз. Хамирни тўртта зувалачаларга бўламиз. Уни ўртача қалинликда ёйиб, эни 5-6 см катталикда кесамиз. Бўлакларнинг орасига начинкани солиб, рулет шаклида ўраймиз. Ушбу ўрама 35-40 дақиқадан сўнг тайёр бўлади. Уни дастурхонга тортишдан аввал қанд упаси билан безатишни унутманг.

Ҳиндча товуқли таом
Масаллиқлар: 200 гр товуқ гўшти ва гуруч, 2 та пиёз, 3-4 та саримсоқ паллалари, 1 ош қошиқ томат пастаси, 2-3 та булғор қалампири, туз ва зира.
Тайёрланиши: қизиган ёғда паррак шаклида тўғралган саримсоқни ва пиёзни қовурамиз. Улар олтинрангга киргач, товуқ гўштини ҳам солиб, қовуришда давом этамиз. Унга томат пастаси ва сомонча шаклида тўғралган булғор қалампирини соламиз. Туз, зира ва озгина сув қўшиб, димлаймиз. Ушбу аралашма ўта суюқ ҳам, қуюқ ҳам бўлмаслиги керак. У тайёр бўлгунга қадар алоҳида қозонда гуручни пишириб оламиз. Агар гуруч эзилмаслигини истасангиз, уни тенг миқдордаги ёғ ва сув билан бирга пиширинг. Олайлик, 1 пиёла гуручга ярим пиёла ёғ ва сув соламиз. Сув қайнаб чиққач, оловни пасайтириб, димлаб қўямиз. Бирор шаклли идиш (пиёла ёки махсус қолип)ни совуқ сувда ювиб, унга гуручни соламиз. Уни ликопчага ағдарганингизда ажойиб кўриниш акс этиши керак. Устидан товуқли аралашмани солиб, кўкатлар билан безатасиз.

Шоҳона таом
Масаллиқлар: 1 та товуқ оёғи, 4 та тухум, 1 ст. ўсимлик ёғи, 7-8 та картошка, 2 та помидор, 0,5 ст. сметана, 1 боғ укроп, туз ва зираворлар.
Тайёрланиши: товуқ гўштини ярим соат шўр сувга бўктириб қўямиз. Уни бир неча бўлакларга бўламиз. Унга туз ва зираворлар сепиб, маринадлаймиз. Тухум сариғи ва оқини ажратиб, иккисини ҳам кўпиртириб оламиз (эслатма: тухум оқини безедек кўпиртириш керак). Гўшт бўлаклари аввал тухумнинг оқига ботирилиб, қизиган ёғда қовуриб олинади. Барча бўлакларни қовуриб бўлгач, тухумнинг сариғида ҳам қовурамиз. Сўнг бошқа идишга қозонга ёғ солиб, товуқ бўлакларини соламиз. Помидорни парраклаб, гўшт устидан териб чиқамиз. Унга сметанани қуйиб, майда тўғралган кўкатларни соламиз. Гўшт бўлаклари пишгунга қадар картошкадан фри тайёрлаб оламиз. Картошкани сомонча шаклида тўғраб, ёғда қизартириб пиширамиз. Товуқ гўштини фри билан бирга дастурхонга тортамиз.

Фарғонача бостирма
Масаллиқлар: 1 кг қўй гўшти, 200 гр думба, 4-5 та картошка, сабзи, пиёз, помидор, булғор қалампири, туз ва зираворлар.
Тайёрланиши: думбани йирик тўртбурчак шаклида тўғраб, совуқ қозонга териб чиқамиз. Сўнг йирик тўғралган сабзи, гўшт, картошка, помидор, булғор қалампирини териб, устидан паррак шаклида тўғралган пиёзни соламиз. Дарвоқе, бостирмага таъбга кўра туз ва зираворлар солиб, бир пиёла сув қўшишни ҳам унутманг. Агар унинг сувлироқ бўлишини истасангиз, кўпроқ сув солишингиз ҳам мумкин. Масаллиқлар навбатма-навбат жойлаштирилгандан сўнг қозон қопқоғини ёпамиз. Бостирма 1-1,5 соатда тайёр бўлади. Кўкатларни таом тайёр бўлишига 10 дақиқа қолганда солсангиз, улар витамини ва таъмини сақлаб қолади.

7x7 Gazetasidan