Sog'lom, qalin, mayin va
jilvakor sochlar har bir ayolning
orzusi hisoblanadi. Bu orzuni
amalga oshirish uchun nafaqat
kosmetik vositalar, balki tabiiy
usullardan ham foydalanish
mumkin. Sizning noto'g'ri
ovqatlanishingiz yoki sochlarni
to'g'ri parvarishlamasligingiz
natijasida ular shikastlanib, o'z
jilvasini yo'qotib, sinuvchan bo'lib
qolishi mumkin.
TO'G'RI OVQATLANING
Sochlarning bir kunda
50-60 tagacha to'kilishi me'yoriy
hol hisoblanadi. Sochlarning
to'rtdan bir qismini suv tashkil
qiladi va u egiluvchanlikni
ta'minlaydi. Organizmdagi
namlikni tutib turish uchun esa
kun davomida 1,5-2 litrgacha suv
ichish kerak.
Oqsil sochni
mustahkamlaydi va tashqi
ta'sirlarga chidamliligini oshiradi.
Oqsil baliq, mol go'shti, qo'y
go'shti, sut va pishloqda mavjud.
Temir moddasi soch tomiridagi
piyozchalarni kislorod bilan
ta'minlaydi. Temir moddasi
go'sht mahsulotlari va ho'l
mevalar tarkibida bor.
Rux moddasi soch
to'kilishining oldini oladi va u
go'sht mahsulotlari, dengiz
mahsulotlarida mavjud. Vitamin A
ning kunlik iste'moli 1,5 mg
bo'lib, u bosh terisi sog'lomligini
ta'minlaydi. Bu vitamin sabzi,
hayvon va baliq jigari, sariyog',
qaymoq, pishloq, tuxum sarig'i,
baliq yog'ida mavjud. Vitamin S
(askorbat kislota) sochlarning
yaxshi o'sishi va jilvakorligini
ta'minlaydi. Apel sin, qulupnay,
qora smorodina, na'matak, olma,
olcha, ismaloq tarkibida mavjud.
Sho'r va tuzlamalarni
me'yordan ortiq iste'mol
qilishning sochlarga zarari bor.
Shuningdek, shokoladlar, qahva,
choyni ham me'yorida iste'mol
qilish lozim.
SOCHNI TO'G'RI
PARVARISHLASH QOIDALARI
- Boshni muntazam
ravishda uqalab turish qon
aylanishini yaxshilaydi.
- Sochlarni bir kunda ikki
marotaba tarash lozim. Uzun
sochlarni pastdan tepaga, kalta
sochlarni esa asosidan pastga
qaratib tarash kerak.
- Quruq sochlarni haftada
bir-ikki marta, yog'li sochlarni esa
ikki-uch marta yuvish foydali.
- Shampun tanlayotganda
sochingiz turiga qarab tanlashni
unutmang.
- Sochni yuvish tartibi:
sochlar iliq suv bilan namlanadi.
Avval shampun, keyin bal zam
bilan yuviladi.
- Sochni iloji boricha
quyosh nurida quritish foydali,
qishda esa sochiq bilan artib
quritish lozim. Fenni iloji boricha
kamroq ishlatishga harakat
qiling.
- Gel, muss, lak va shu kabi
kosmetik vositalarni kamroq
ishlatgan ma'qul. Chunki ko'p
ishlatish sochlarning ko'p
to'kilishiga olib keladi.
- Sochlarni bir yilda ikki-
uch marta xina va basmaga
bo'yash foydalidir.
- Soch uchlari gullab
ketmasligi uchun tez-tez qirqib
turish lozim.
- Nihoyatda issiq hamda
siqib turadigan bosh kiyimi
boshning ko'p terlashiga va
qazg'oqlanishiga, soch
to'kilishiga sabab bo'ladi.
- Boshni kir sovuni bilan
yuvish yaramaydi, aks holda
sochni yog'sizlantirib,
mo'rtlashtirib qo'yadi. Juda issiq
yoki sovuq suvda yuvish ham
soch to'kilishiga sabab bo'ladi.
TABIIY USULLAR
Bir oyda bir marta
sochlarni tagigacha kanakunjut
moyida artib uqalash bosh
terisini oziqlantiradi.
Qalampir nastoykasi soch
to'kilishining oldini oladi.
Sochlarni achchiq damlangan
qora choyga chaysa, jilvakor
bo'ladi.
Boshni har oyda bir marta
limon sharbati bilan artib turilsa,
bosh terisi qon tomirlari
faoliyatini yaxshilab, soch ildizini
mustahkamlaydi. Shuningdek,
limon antiseptik xususiyatga
egaligi bois, sochda uchraydigan
ayrim kasalliklarning oldini oladi.
Shuni esda tutish kerakki,
boshga limon sharbati
surtilganda, soch uchlariga
tegmasligi kerak. Odatda, limon
sharbati surtilganidan 20 daqiqa
o'tgach, soch chayiladi.
Boshni qatiq zardobi
bilan yuvish qadimiy amallardan
hisoblanadi. Zardob tarkibidagi
biologik faol moddalar soch
ildizini mustahkamlabgina
qolmasdan, sochni mayin qiladi,
mo'rtligini yo'qotadi, soch
uchlarining gullashiga yo'l
qo'ymaydi, o'sishini yaxshilaydi,
teri hujayralarining hayotiyligini
oshiradi.
Mahzuna SUVONQULOVA