Олов фестивали (Шотландия)
Викингларнинг ўтмишдаги шон-шуҳратига бағишланган Олов фестивавли – Up Helly-AAнинг расмий номи End of the Holy Days бўлиб, у ҳар йили қиш ўртасида, Янги йил байрамлари тугаганидан сўнг ўтказилади. Фестивалда минглаб "викинглар” ва аёл кийимини кийган эркаклар иштирок этишади. Байрам энг авжига чиққанида викинглар кемасининг ўн метрлик нусхасини ёқиб юборилади.

Маймунлар зиёфати (Ҳиндистон)
Ҳиндистонда ҳар йили "Рамаяна” достони қаҳрамони – маъбуд Раманинг ўн бошли ёвуз шоҳ Раванга қарши курашида ёрдам берган маймунлар подшоси Хонумонга бағишланган фестивал ўтказилади. Ташкилотчилар юзлаб маймунларни тўйгунича меҳмон қилиш учун уч тоннадан ошиқ мева ва сабзавотлар ҳозирлашади.

"Пишлоқ думалатиш” мусобақаси (Англия)
Ўт босган тик тоғ ёнбағридан ғизиллаб думалаб тушаётган икки килограммли пишлоқ бошчаси ортидан югуриш кўпинча иштирокчиларнинг тана аъзолари синиши ва чиқишлари билан тугайди, шу сабабли ҳам полиция бу фестивални ўтказишни тақиқлаган. Аммо асабларни бир оз қитиқлаб олиш истаги кучлироқ бўлган одамлар югуришлар ўтказиладиган жойларни тинмай ўзгартириб туришади. Тик ёнбағирдан думалаб тушаётган пишлоқ бошининг тезлиги соатига юз километргача етади ва иштирокчилар қанчалик уринмасинлар, уни асло тутиб олишолмайди. Шу туфайли ҳам бошқалардан олдинроқ тоғ этагига етиб келган одам ғолиб ҳисобланиб, пишлоқ бошчасининг эгаси бўлади.

Бўёқлар байрами (Ҳиндистон)
Бу қувноқ байрам ҳар йили баҳорда Ҳиндистон ва Непалда ўтказилади. Байрамнинг биринчи кунида ҳамма "ўқ-дори”лар билан қуролланиб олади, иккинчи кунида эса одамлар бир-бирларига рангли упа сочишади, устларидан сув ҳам сепишади. Бу ҳудудларда баҳор об-ҳавоси тез-тез ўзгаравергани туфайли грипп касаллиги катта таҳдид солади. Шунинг учун ҳам маҳаллий шифокорлар тавсиясига кўра, отиш учун мўлжалланган бўёқлар таркибига шамоллашга қарши ишлатиладиган маҳаллий доривор гиёҳларни аралаштирилади. Оқибатда қувноқ ранглар фестивали олдамларни даволашдек эзгу ишни ҳам амалга оширади.

Балиқ отиш фестивали (Австралия)
Австралия мустақиллиги куни – 26 январда Порт-Линкольда қизиқ манзара намоён бўлади. 1962 йили илк бора бундай тадбир ўтказилишидан мақсад бу ҳудудда тунец балиғини овлашга инвестицияларни жалб қилишдан иборат бўлганди. Ҳозирги пайтда эса тунец балиғини овлаш Австралиядаги нисбатан энг ривожланган соҳалардан бири ҳисобланади ва фестивал ўтказиладиган жой яқинида қитъадаги энг катта консерва заводи жойлашган. Балиқ отиш фестивалининг рекордчиси тўқмоқ улоқтириш бўйича собиқ Олимпиада чемпиони Шон Карлин бўлиб, у 1998 йили балиқни 37 метрга ота олган.

Помидорлар байрами (Испания)
Август охирида Буньол шаҳрида помидорлар байрами – La Tomatina ўтказилади. Шаҳарнинг минглаб аҳолиси бир соат мобайнида ўз яқин-атрофидаги одамларни помидор билан нишонга олади ёки кўчаларни қоплаб оладиган помидор шарбатида чўмилишга уринади. Одамларнинг ҳар бирига бир неча килограмм помидор тўғри келади, шу туфайли ҳам бу "жанг” пайтида нималар юз беришини тасаввур қилиш қийин эмас. Қоидага кўра, фестиваль иштирокчиларининг ўзаро жанжаллашиши мумкин эмас, шу сабабли "жанг” тинчгина ўтади. Бу тадбирни минглаб сайёҳлар томоша қиладилар.
Ҳусниддин тайёрлади.

7x7 GAZETASIDAN